Projekte të përbashkta Siçili-Tiranë

Meta pret krye bashkiakun Orlando: Projekte të përbashkta Siçili-Tiranë.

Siçilia dhe Tirana zyrtare do të bashkëpunojnë në projekte ekonomike, turistike dhe kulturore. Kjo dakordësi u arrit në takimin që kryetari i Kuvendit Ilir Meta pati me kreun e Bashkisë së Palermos Leoluca Orlando i cili vizitoi për herë të parë vendin tonë.

Kryetari i Kuvendit u shpreh se ekziston një lidhje e fortë historike miqësie mes dy popujve tanë, e cila përforcohet edhe përmes prezencës së fshatrave arbëreshe në Siçili, lidhje e cila duhet materializuar në projekte konkrete bashkëpunimi e  investimi për të ardhmen.

Nga ana e tij, kryebashkiaku Orlando vuri në dukje se shqiptarët kanë një domethënie të veçantë për popullin siçilian falë lidhjeve historike.

Në përfundim të takimit kreu i Bashkisë së Palermos ftoi kryeparlamentarin Meta të vizitojë Siçilinë së shpejti, ftesë e cila u mirëprit me kënaqësi.

Gjithashtu, zyra e shtypit e Kuvendit njofton se gjatë së premtes Meta priti në një takim edhe presidentin e Federatës Ndërkombëtare të Shoqatave të Kryqit të Kuq dhe Gjysmëhënës së Kuqe. Tadateru Konoe. të cilin e falënderoi për kontributin e jashtëzakonshëm të Kryqit të Kuq në Shqipëri në vite.

Meta vuri në dukje se Kuvendi inkurajon rolin aktiv të organizatës në mbështetje të çështjeve humanitare që kërkojnë vëmendje në Shqipëri e në rajon.